 |
| Zulkifli Yahya pada acara silaturrahmi World acehnesse Association di Denmark 2009. [Foto Waa]. |
WAA - Jumat 27/11/2009 HIKAYAT Uleh: Zulkifli Yahya (Getjhik Don)
Seumike Keu Rakjat Jeulata “Jilid 3”
Djinòë tasambông saboh hikajat
Kisah ka meuhat Rakjat djeulata
Keu rakjat Atjèh tapike beubrat
Njang tarék pukat bek lé meurana
Djinoe tapike sabe keu rakjat
bek lé meularat deungon meurana
pakiban tjara usaha beubrat
uléh peujabat deungon bentara
Hukum di Atjèh beu tapeu bèrèh
Bek lé meudalèh deungòn djakarta
Peulabuhan sabang indah bukan lé
Djinòë kasampe jipulang sigra
Wali kota sabang kadjeut seumike
Bak bineh pante peugot wisata
Bek lé meulaloë wahe rakan lon
Peugot seunambong ngon nanggroe luwa
Para investor undang beubagah
Ladju neupegah bak pengusaha
Neutanom saham keunan usabang
Mangat berkembang ladju seugeura
Hai pemerintah di nanggroe atjeh
Neupiké beuleubéh keu rakjat djeulata
Baklé na rakjat yang udep susah
Neu peuna beubagaih lapangan keureudja
Neudidek ridjang rakjat di Atjèh
Bèk lé dipeu èlèh lé awak luwa
Nanggroë Atjèh njòë seuramòë meukah
Nanggroë meutuwah pusaka kaja
Joh masa dile Atjèh ka meugah
Masa peurintah iskandar muda
Djinòë keulai tapike bagaih
Atjèh beumeugah lagèë njang ka ka
Hasé di Atjèh meulimpah ruah
Minjêuk deungòn gaih dan batu bara
Neupike tjara hai pemerintah
Beudjeut ta olah kirem u lua
Joh masa dile hase djireupah
Keudeh di papah pulou djawa
Djinòë hana le meu gop yang reupah
Beugot tapah harta pusaka
Rakjat djeulata sabe geu prèh-prèh
Padjan keuh djadèh Atjèh seudjahtra
Kamòë di luwa sabe seumike
Atjèh boh hate beuseudjahtera
Kamòè meuharap nibak peumipin
Keu fakir miskin neupike sigra
Rakjat di Atjèh trep that ka susah
But pemerintah ngòn penguasa
Bah pih tjit djinoe atjeh ka damê
Mantong tjit ramê dalam peutjara
Òhnòë keuh dilè kisah hikajat
Meunjoe na pakat tasambong tema.
Zulkifli Yahya adalah Aktivis WAA berdomisili di Denmark
