Beudoh Bangsa Lon (II)

Aiyub Ilyas

WAA  – Jumat 01/01/2010 *CAE* Peunuléh: Aiyub Ilyas

BEUDOH BANGSA LON Bagian II

Bak bagian phon rakan meutuah
Kalheuh lon peugah padum krak haba
Jinoe ta sambon ngen izin Allah
Tuma ta bahas bagian dua

Bak bagian nyoe ulon neuk peugah
Rakyat that susah mita beulanja
Di kamoe gasien ka apoh apah
Deuk dengen grah tan le so kira

Raseuki payah leupah meuceukik
Han tatuho sik ta ilah daya
Rakyat umpama boh limeng leumik
Dum ho dilingiek sabe lambala

Meunan lom bagoe dum korban konflik
Tan na meusiliek bantuan teuka
Hudep di kamoe lage glang capiek
Meu lingiek-lingiek wate uro kha

Korban tsunami ladom ka rangoe
Sampoe uroenyo rumoh goh lom na
Menteng bak barak meulikak pinggang
Hana geu tujan bantuan teuka

Ladom peujabat jinoe hai rakan
Hudep that senang geulimang harta
Ka geuek moto meutuka-take
Tan le geupike keu nasib bangsa

Ngen peng meulimpah yang troek u Aceh
Bek gadoh peuceh aneuk kukura
Neu pike program peu makmu Aceh
Bek jeut keu bijeh khianat bangsa

Jujoe ngen ade sabe peutimang
Karna deungen nyan tanyoe mulia
Bak but korupsi peujioh rakan
Karena but nyan tanyo binasa

Syukur keu Allah dame peu timang
Lage ka geufam di Fillandia
Antara RI dengan pihak GAM
Lam wate damai tapeuget bangsa

Tgk. Irwandi yang kamoe pileh
Beu saboh gareh ngen Muhammad Nazar
Neu duk ngen neu deng beusaban pakat
Pike keu rakyat Aceh mulia

Mulia wareh ranup lam puan
Mulia rakan mameh suara
Mulia Aceh martabat tinggi
Mudah raseuki rakyat sejahtra.

Beudoh bangsa lon Aceh meutuah
Seureumpak langkah ban sigom donya
Tajak seumike keu nasib naggroe
Untuk tapuwo maruah bangsa

Oh noe keuh menteng bak masalah nyoe
Ta sabong dudoe laen peukara
Meuah lon lake keu kawom nanggroe
Menyo na asoe menyinggong gata

Salam ’alaikum kata peunutop
Pujoe seulaweut beule tabaca
Do’a bak Allah ban seun-seun uroe
Aceh lhe sagoe beu ek mulia.

Aiyub Ilyas Adalah aktivis World Achehnese Association, Mahasiswa Master Kesehatan Jiwa HUC Norwegia